不可能的任務

3分幾鐘嘅微電影，要喺一日之內完成拍攝，當中要走超過五個景，包括新舊店舖、學校門外、公園等等，而且兩位主角Ian同冰冰的拍攝時間都有限，要完咁短時間內完成整個拍攝的確係不可能的任務。

導演、製片及Agency同客戶經過多番討論，首先嘗試將個故事內容精簡，之後導演同攝影師預先到達每一個場景，預先想好每一個場景適合拍攝嘅地點同角度，務求令到當日拍攝嘅進度加快，加上起用替身嘅幫助，令到每一位主角喺有時嘅拍攝時間裡面都好似同時出現係多個場景之中，當然更重要嘅當然係Ian同冰冰嘅專業態度，對所有對白嘅熟練以及真摯嘅演繹，再加上花姐錦上添花嘅演出，先可以完成呢個不可能嘅任務。

為咗令條片出嚟嘅效果更加好，製作團隊更再次搵咗兩位替身，分開另一日到多個地點拍攝好多非常有感覺的Mood Shot加入條片裏面，令到條片出嚟嘅效果更加豐富。

所以一條片嘅成功係需要整個團隊嘅負出很大的努力先至能夠完成。好幸運呢條片出街之後能夠得到廣泛嘅認同，而且喺各個媒體都有報道，除咗演員嘅真摯演繹外，媒體對拍攝角度、燈光以至當中嘅每一個對口都有高度讚揚，呢個係我哋始料不及嘅。更幸運嘅係呢一條片更加令我哋獲得YouTube Works Award Hong Kong 2021裏面嘅三個大獎，能夠得到呢個成績對我哋整個團隊亦都係非常之鼓舞 。